„Sterkar vísbendingar eru fyrir því að þeir hópar sem fá hvað stærstan hluta af sinni orku úr gjörunnum matvælum séu líklegri til að þróa með sér lífsstílssjúkdóma og lifa skemur.“ Þetta kemur fram í úttekt Bændablaðsins sem var að koma út.
Í úttektinni kemur fram að Íslendingar eru meðal þeirra Evrópuþjóða sem mest neyta af gjörunnum matvælum eða 45 prósent samkvæmt könnun sem gerð var 2019 og 2020. Í Norður-Ameríku er hlutfallið 55-60 prósent en á Ítalíu er hlutfallið aðeins 11 prósent.
„Helstu einkenni gjörunninna matvæla eru meðal annars langar innihaldslýsingar þar sem finna má litarefni, bragðefni og bindiefni. Hráefnin hafa oft undirgengist marga vinnsluferla og er markmiðið yfirleitt að gera söluvænlega vöru úr ódýrum hráefnum með góðu bragði og áferð.“
Bryndís Eva Birgisdóttir, prófessor við matvæla- og næringarfræðideild Háskóla Íslands segir í Bændablaðinu að meirihlutinn af gjörunnum matvælum séu það sem við myndum kalla óheilsusamleg matvæli eins og snakk, gos, sælgæti, kex og kökur. Einnig megi nefna skyndibita, tilbúin matur, þurrvara eins og morgunkorn, fæðuefni og annað slíkt fallið undir gjörunnin matvæli.
Á vef Matís er einnig fjallað um gjörunnin matvæli eins og lesa má hér.
