Þetta skyrbrauð baka ég í hverri viku heima og er jafnvel farinn að hugsa um að bjóða upp á það á Heilsustofnun. Hver veit nema það rati þangað á morgunverðarborðið. Það er einfalt í undirbúningi og þarf hvorki að hnoða né hefa. Höfrum, skyri, birkifræjum og hörfræjum er hrært saman við hin hráefnin og síðan tekur ofninn við.
Uppskriftin gefur stóran hleif, en ef þið eigið ekki stórt brauðform má skipta deiginu í tvö jólakökuform. Þá má hafa annað brauðið til að njóta strax og skera hitt í sneiðar og frysta. Það er gott að eiga slíkar birgðir þegar mann langar í holla brauðsneið með góðu áleggi.
Uppskriftin er líka góður grunnur til að prófa sig áfram. Skiptið birki- og hörfræjunum út fyrir sólblómafræ, graskersfræ eða sesamfræ, eða bætið við grófsöxuðum hnetum fyrir meira bit. Rifnar gulrætur gefa brauðinu milda sætu og aukinn raka; þá getur verið gott að minnka mjólkina örlítið svo deigið verði ekki of blautt. Þannig má baka eftir sömu grunnuppskriftinni í hverri viku án þess að brauðið verði alltaf eins.
Skyrbrauð:
- 400 g hafrar
- 2 tsk matarsódi
- ½ tsk fínt salt
- 2 msk birkifræ
- 2 msk heil hörfræ
- 500 g hreint skyr
- 220 ml mjólk
- 1 egg, létt pískað
- Birkifræ og hörfræ til að strá yfir
Aðferð:
- Hitið ofninn í 200°C. Smyrjið stórt brauðform eða tvö jólakökuform, eða klæðið með bökunarpappír.
- Blandið höfrum, matarsóda, salti, birkifræjum og hörfræjum saman í stórri skál.
- Bætið skyri, mjólk og eggi út í. Hrærið þar til allt hefur blandast vel saman. Deigið á að vera þykkt og rakt.
- Setjið deigið í formið eða skiptið því á milli formanna og jafnið yfirborðið. Deigið er þykkt. Þjappið því vel í formið og sléttið yfirborðið. Dragið grunna línu eftir miðju með skeið eða hníf og stráið birki- og hörfræjum yfir.
- Bakið stóran hleif í um 50 mínútur, eða þar til brauðið er bakað í gegn. Tvö minni brauð geta þurft styttri baksturstíma; fylgist með þeim.
- Látið brauðið kólna örlítið í forminu, takið það síðan úr og látið kólna vel á grind áður en það er skorið.
- Fyrir stökkari skorpu: Takið brauðið úr forminu þegar um 5 mínútur eru eftir af bakstrinum og bakið það áfram beint á ofngrindinni.
Verði ykkur að góðu!
Myndir: Halldór Steinsson
