Lax, kjúklingabaunir, harissa og feta

Ofnbakaður lax með hunangi og limeberki ásamt kjúklingabaunasalati með hvítlauk, sítrónuberki og fetaosti. Granateplasíróp í lokin setur punktinn yfir I-ið. Þetta verður enn ferskara með konfekt tómötum í lokin. Þessi uppskrift smellpassaði fyrir þrjá.

Fiskurinn:

• 600 g laxaflak
• Hunang
• 1 limebörkur

Aðferð:

1. Roðdragið laxaflakið og þerrið fiskinn vel.
2. Setjið 1-2 tsk af hunangi ofan á fiskinn og dreifið jafn yfir með höndunum. Rífið börk af lime jafn yfir fiskinn.
3. Bakið í 200 gráðum í 10-15 mínútur.

Baunasalat:

• 1 dós kjúklingabaunir
• Ólífur
• 1 msk harissa
• 3 msk ólífuolía
• 3 hvítlauksrif
• 1 sítrónubörkur
• Ferskt basil
• 1 stk fetaostur
• 1 msk granateplasíróp

Aðferð:

1. Blandið kjúklingabaunum, skornum ólífum, harissa, olíu, söxuðum hvítlauk og rifnum sítrónuberki í eldfast fat.
2. Bakið við 200 gráður í 25 mínútur. Hrærið öðru hvoru.
3. Takið út og skreytið með fetaosti, basil og smávegis af granateplasírópi ef þið eigið það til. Nýtið einnig sítrónu og/eða lime sem notaðar voru barkarrifin í uppskriftinni.

Myndir: Pálmi Jónasson