Hafdís Hrund stofnandi og eigandi Fargufu hélt erindi um heilsufarsáhrif gufugusu á aðalfundi Náttúrulækningafélags Reykjavíkur 18. mars en hún er með fargufur við Ægisíðu, Skarfaklett og í Gufunesi.
Hafdís Hrund segir að heilsufarsáhrif gufugusu væru mikil og góð. Hjartsláttur aukist og þar með blóðflæði. Æðarnar víkki sem auki flæði næringar og súrefnis um allan líkamann og styrki slímhúð æðanna. Þegar á fyrstu mínútu sendi heilinn boð til hjartans að slá örar og eftir fjórar mínútur aukist blóðflæðið út í húðina og við byrjum að svitna.
Hafdís Hrund segir að endorfín framleiðsla aukist í gufubaði sem sé verkjastillandi og veki sælu og vellíðan. Hún segir að eftir tíu mínútur virkist hitasjokksprótein sem heili skemmdar frumur og hjálpi til við endurheimt orku og dragi úr bólgum. Hún segir að hugurinn skýrist í gufunni, heilastarfsemin styrkist og að gufan dragi úr líkum á alzheimer sjúkdómnum. Gufan bæti svefn, styrki hjarta og æðakerfið, lækki blóðþrýsting, sé bólguminnkandi og dragi úr kvíða. Við kælinguna losi líkaminn sig við eiturefni og þungmálma en gufubað sé eina leiðin til að losa sig við þungmálma sem valdi verkjum, þreytu og meltingartruflunum og mögulega alzheimer segir Hafdís Hrund. Gufan hreinsi og næri húðina en aukið blóðflæði færi húðinu súrefni og næringu sem gefi sannan ljóma eftir gufubað.
Köld böð eða víxlböð eru einskonar æðaþjálfun sem styrkir blóðrásarkerfið segir Hafdís Hrund. Æðarnar dragist saman við kuldann og þessi víxlverkun byggi upp sveigjanleika æðanna og getu líkamans til að bregðast við streitu. Hún segir að sjórinn sé mikilvægur þáttur í gufugusu en þar sé jarðtengingin, steinefni og næringarefni í þaranum. Þar búi náttúran og núvitundin.
Myndir: Pálmi Jónasson
