Hreindýrahakk er frábært í kjötrétti ýmiskonar og lasanja er þar engin undantekning. En þá gildir að láta hreindýrabragðið njóta sín og drekkja því ekki í tómatsósu og sterku kryddi. Hakkið fékk ég í Melabúðinni. Parmesan, ristaðar kasjúhnetur og góð bláberjasulta setja punktinn yfir I-ið.
Þú þarft:
- 1 kg hreindýrahakk
- 1 kg kotasæla
- 2 pk kantarellur
- 1 stk laukur
- 1 stk gulrót
- 4 stk hvítlauksrif
- 1 tsk chili flögur
- Salt og pipar
- Parmesan/ostur
- Ristaðar kasjúhnetur
- Bláberjasulta
Aðferð:
- Hellið sjóðandi vatni yfir kantarellurnar til að mýkja sveppina. Sigtið og geymið soðið.
- Muldar kasjúhnetur ristaðar á þurri pönnu og sett til hliðar.
- Steikið hakkið á pönnu með pipar og salti. Leyfið því að karmeliserast óhreift áður en þið snúið kjötinu. Brytjið það niður og steikið áfram á pönnunni þar til það er tilbúið í grænmetispottinn.
- Steikið grænmetið og sveppina í steypujárnspotti. Bætið kjötinu við og sveppasoðinu. Gott að láta þetta malla í hæfilega þykkt með meiri vökva, góðu soði eða víni. Púrtvín er ekki galið. Kotasælan kemur í stað hvítu sósunnar og er blandað við kjötsósuna.
- Kjötsósan fer neðst í smurt eldfast fat og svo lasagnablöð og kjötsósa til skiptis. Ofan á efsta lagið af kjötsósunni er settur ostur, kasjúhnetur og vel af parmesan.
- Bakað í 200-220 gráðum í ofni þar til fallega brúnað. Góð bláberjasulta smellpassar með hreindýrabragðinu.
Myndir: Pálmi Jónasson
