Aukin sykurneysla undanfarinna áratuga er talinn eiga sinn þátt í mörgum nútímasjúkdómum sem hrjá okkur.
Margar rannsóknir hafa sýnt fram á tengsl sykurs við offitu, sykursýki, ofvirkni og hjartasjúkdóma.
Vísindamennirnir Lustig, Schmidt og Brindis gengu svo langt í frægri grein sinni „The toxic truth about sugar“ í tímaritinu Nature fyrr á þessu ári að krefjast þess að sykur verði meðhöndlaður á sama hátt og áfengi og tóbak vegna þess hversu mikið eitur hann sé. Sykurbragðið er merki um mat sem öruggt er að borða.
Það er engin náttúruleg matartegund sem er bæði sæt og eitruð og því erum við frá náttúrunnar hendi sólgin í sykur. Vandamálið er hins vegar að sykurmagnið sem við innbyrðum í dag er langt umfram það sem við getum innbyrt í náttúrulegri fæðu. Mikið af þeim sykri sem við innbyrðum er falinn. Hann leynist í stórum hluta þeirra matvæla sem við kaupum og getur farið í yfir 60% af innihaldi vörunnar. Dæmi um vörur sem innihalda mikinn sykur eru ýmsar mjólkurvörur, brauð, sultur, sósur, kjöt sem er kryddlegið, morgunkorn, tómatsósa, fitusneyddar vörur þar sem sykur er oft notaður til að bæta upp bragðmissinn og fleira og fleira.
Með því mesta sem þekkist í heiminum!
Meðal Íslendingurinn innbyrðir um 1 kg. af sykri á viku, sem er með því mesta sem þekkist í heiminum. Meðal barna er hlutfall sykurs í fæðunni jafnvel enn hærra en hjá fullorðnum. Samkvæmt Neytendasamtökunum borðar leikskólabörn að meðaltali 54 gr. af sykri á dag, eða yfir 19 kg. af hreinum sykri á ári. Það er rúmlega meðalþyngd 4 ára drengja. Þetta er meðaltalið sem þýðir að mörg börn borða talsvert meira magn en þetta af sykri.
Á myndinni má sjá fjögurra ára barn með 1.620 gr af sykri fyrir framan sig, sem er það magn sem það innbyrðir að meðaltali á mánuði. Þetta gríðarlega magn af sykri er einfaldlega meira en lifurin getur unnið úr.
Dr. Kimber Stanhope við Kaliforníuháskóla hefur sýnt fram á í nýlegri rannsókn að þegar lifurin fær meira magn af sykri og sæturefnum en hún getur unnið úr breyti hún sykrinum í fitu sem fer út í æðarkerfið og myndar þar meðal annars kólesteról. Þetta kólesteról sest í æðarnar og eykur líkurnar á hjartasjúkdómum. Sykur er ávanabindandi og þó ekki sé hægt að kenna sykri um alla offitu og heilsuvandamál henni tengdri, þá er sykurinn einn aðalhvatinn í ofneyslu á mat. Þeim mun meira sem þú neytir af sykri, þeim mun meira kallar líkaminn á hann og þarf stöðugt stærri skammta til að fullnægja þörfinni. Þess vegna er mikilvægt að venja börn strax á sykurlitla fæðu til að forða þeim frá því að lenda í vítahring sykurfíknar.
Náttúrulækningafélag Íslands hefur í áratugi varað við ofneyslu sykurs. Á næstu vikum munum við birta ýmsar greinar um áhrif sykurs og góð ráð um hvernig megi með einföldum hætti minnka sykur í daglegri væðu verulega.
Heimildir:
Landlæknisembættið: http://www.landlaeknir.is/servlet/file/store93/item2830/version6/4138.pdf
Neytendasamtökin: http://ns.is/ns/modules/100/print.aspx?id=314154&ownertype=1&ownerid=811…
CBSnews: http://www.cbsnews.com/video/watch/?id=7403942n
Nature : http://www.nature.com/nature/journal/v482/n7383/full/482027a.html?WT.ec_…
Total Health: http://totalhealthmagazine.com/articles/diabetes/a-poison-in-your-food-l…
