Kotasælubrauð með höfrum og gulrótum

Kotasæla hentar virkilega vel í brauðbakstur. Hún er próteinrík og gefur brauðinu raka og mýkt. Í þetta brauð notum við kotasælu, hafra, rifnar gulrætur, graskersfræ og hörfræ og stráum sólblómafræjum yfir áður en það fer í ofninn. Í stað sólblómafræja og graskersfræja má nota önnur fræ eftir smekk eða sleppa þeim alveg. Haldið þó hörfræjunum í uppskriftinni. Ef þið viljið hafa brauðið glútenlaust, veljið hafraflögur og lyftiduft sem eru merkt glútenlaus.

Brauðið er einfalt í undirbúningi: hráefnunum er blandað vel saman og deigið sett í form eða mótað í hleif. Það er gott með smjöri og osti, avocado, hummus eða með heitri súpu. Látið það kólna áður en það er skorið. Uppskriftin miðast við eitt brauð.

Kotasælubrauð:

  • 200 g hafraflögur
  • 300 g kotasæla
  • 50 g graskersfræ
  • 2 msk hörfræ
  • Um 1 dl rifnar gulrætur
  • ¼ tsk sjávarsalt
  • 2 egg
  • 1 tsk lyftiduft
  • Sólblómafræ til að strá yfir

Aðferð:

  1. Hitið ofninn í 180°C. Klæðið 1 lítra brauðform eða bökunarplötu með bökunarpappír.
  2. Setjið öll hráefnin í skál, nema sólblómafræin, og blandið vel saman.
  3. Setjið deigið í formið, þrýstið því jafnt niður og sléttið yfirborðið. Einnig má móta deigið í aflangan hleif og leggja á bökunarplötuna.
  4. Stráið sólblómafræjum yfir og þrýstið þeim létt niður.
  5. Bakið í um 50 mínútur, þar til brauðið er gullið og bakað í gegn. Bökunartíminn getur verið breytilegur eftir lögun og þykkt hleifsins.
  6. Látið brauðið kólna á grind áður en það er skorið í sneiðar. Ef það er bakað í formi skal taka það úr forminu áður en það kólnar alveg.

Verði ykkur að góðu!


Related posts

Þorskur og kartöflur í tælensku karrí

Hunangsristaðar gulrætur

Tælensk núðlusúpa