Eggaldin í parmesanhjúp með tómat og basil er úr smiðju Halldórs Steinsson yfirmatreiðslumanns á Heilsustofnun Náttúrulækningafélagsins í Hveragerði. Eggaldin eru mjög næringarrík og þetta er því uppskrift sem stuðlar að betra heilbrigði og bætir bragðlaukana.
Þú þarft:
- 1 eggaldin
- 2 pískuð egg
- Smá heilhveiti
- Brauðrasp
- Parmesan
- Salt og pipar
Aðferð:
- Skerið eggaldin í sneiðar og saltið báðar hliðar. Látið saltið þurrka eggaldinið í um 10 mínútur. Þurrkið svo sneiðarnar með pappír og leggið þær í heilhveiti svo það loði við báðar hliðar. Setjið sneiðarnar í eggjablönduna og því næsta brauðrasp og parmesan sem er blandað saman til helminga.
- Steikt í olíu á pönnu í um tvær mínútur á hvorri hlið.
Tómatbasilsósa:
- 2 msk ólífuolía
- 1 saxaður laukur
- 1 box basil
- 1 dós tómatar
- 10 sólþurrkaðir tómatar
- 4-5 hvítlauksrif
- Salt og pipar
Aðferð:
- Laukurinn léttsteiktur í olíunni á pönnu. Bætið við tómötum og hvítlauk og látið malla í 10-12 mínútur.
- Maukið með töfrasprota og bætið basil við í lokin.