Innbakað blómkál að hætti Ottolenghi með sinnepi og cheddar. Stórbrotin máltíð sem passar fyrir 6 með einhverju á kantinum. Verið óhrædd að breyta uppskriftinni. Notið það krydd sem þið eigið og finnst gott og ostinn sem til er í skápnum. Stærð smelluformsins er ekki lykilatriði.
Þú þarft:
- 1 blómkál
- 2 tsk karrýduft
- 3 msk ólífuolía
- 100 g ósaltað smjör
- 75 g hveiti
- 675 ml mjólk
- 2 hvítlauksrif
- 1,5 msk sinnep
- 150 cheddar
- 6 blöð filo deig
- Salt og pipar
- 1 msk steinselja
- 1,5 tsk limebörkur
Aðferð:
- Hitið ofninn í 180 gráður. Skerið blómkálið í munnbita og kryddið með karrý, hálfri teskeið af salti og vel af pipar. Bakið í helmingnum af olíu í ofni í 20 mínútur. Takið blómkálið til hliðar og lækkið ofninn í 170 gráður.
- Béchamel sósan er gerð þannig að smjörið er brætt í potti og hveiti bætt við. Látið þetta malla í 2-3 mínútur eða þar til kemur létt hnetulykt. Lækkið hitann og bætið mjólkinn smám saman við og pískið vel í um 7 mínútur eða þar til þetta hefur þykknað. Takið af hitanum og bætið við hvítlauk, sinnepi, osti og örlitlu salti. Blandið sósunni og blómkálinu saman.
- Smyrjið 23 sentimetra smelluform með smjöri og hveiti eða með bökunarpappír. Leggið filóblöðin í formið og smyrjið hvert lag með bráðnu smjöri. Leggið þær á víxl þannig að þær geti lokast jafnt. Hellið blómkálsblöndunni ofan á filo deigið og flettið því af deiginu sem út af stendur yfir blómkálið. Penslið yfir með bráðnu smjöri og bakið í ofninum í 30 mínútur.
- Losið hliðarnar af smelluforminu og bakið áfram í 20-25 mínútur. Látið kólna í 15 mínútur.
- Skreytið með fersku kryddi og límónuberki.
Myndir: Pálmi Jónasson